El Correo

Desgaitasuna duten pertsonek jarraituko dute Arriagako gizarte etxea eta Adurtzako zentro soziala garbitzen

  • ASAFESekiko lankidetza-hitzarmen honek urtebeteko indarraldia izango du, 2017ko urtarrilaren 1etik abenduaren 31ra arte, eta 121.548 euroko zuzkidura.

Gasteizko Udalak ASAFES elkartearekiko hitzarmena luzatuko du, desgaitasuna duten pertsonek Arriagako gizarte etxea eta Adurtzako zentro soziala garbitzen jarrai dezaten.

Udal gobernuak oraingo lankidetza-hitzarmena luzatzea onetsi du, dibertsitate funtzionala duten pertsonei laneratzen laguntzeko, talde horrentzat “oso zaila izaten baita lan-merkatuan sartzea. Erakundeak horretaz jabetzen gara, eta ahal dugun neurrian herritar horiek ere lan-bizitza garatzeko aukera izan dezaten laguntzen dugu”, adierazi du Udal Administrazioaren Saileko zinegotzi Carlos Zapaterok.

Udalak hainbat modutan erakusten du gizarteratzeko lanarekiko konpromisoa: lanaren inguruko informazio eta orientabideak emateko programak garatuz, prestakuntza planak diseinatuz, lanbide birziklatzea bultzatuz, eta zeregin batzuk –garbiketa, esaterako– ASAFES eta antzeko taldeei emanez; aipatutako elkartea 2000az geroztik arduratzen da udalaren zenbait lokal –Arriaga eta Adurtzakoak– garbitzeaz, hitzarmenen bitartez.

ASAFESekiko lankidetza-hitzarmen honek urtebeteko indarraldia izango du, 2017ko urtarrilaren 1etik abenduaren 31ra arte, eta 121.548 euroko zuzkidura.