El Correo

Aldundiak urrian hasiko ditu Melledes eta Manzanos arteko errepidea hobetzeko lanak

  • Milioi bat euro baino gehiagoko inbertsioa egingo da.

Arabako Foru Aldundiak 1,1 milioi euro inbertituko ditu Melledes eta Manzanos arteko A-4340 errepide tartea zabaltzen eta hobetzen, gaur egun bihurgune ugari eta itxi eta zoru hondatua dituen bidearen erabiltzaileei bidaia seguru eta erosoagoak eskaintzeko. Inguruko herrietako eskola garraioek errepide hori erabili ohi dute.

Lanak datorren urrian hasiko dira eta ziurrenik hurrengo udan bukatuko dira. Diputatuen Kontseiluak gaur esleitu du errepide hori zabaltzeko eta hobetzeko proiektua, zeinak 1,1 milioi euroko aurrekontua eta gauzatzeko hamar hilabeteko epea izango dituen. Bide Azpiegituren eta Mugikortasunaren Sailak bultzatutako proiektu horrek Melledes eta Manzanos arteko 2,3 kilometroak egokitzea du helburu; alegia, bost metro eta erdi zabal izango den galtzada bat egitea.

A-4349 errepidearekin bat egiten duen lekuan hasten da A-4340 Errepidea, eta bukatu Melledesko hiri zona hasten den lekuan, eta Rivabellosa eta Quintanilla de la Ribera eta Melledes (Erriberabeitia) lotzen ditu. Bide horrek Manzanoserantz egiten du lau metro zabal ez den bide estu eta bihurgune ugariko eta itxiko eta oso zoru hondatuko batean zehar.

Horiek horrela, jarduera honekin, jarraipena ematen zaie Rivabellosa eta Melledes arteko bide tartea egokitzeko duela sei urte egindako lanei.

Proiektuak lan hauek aurreikusten ditu: zorua zabaltzea eta hobetzea, egungo lotura errepide bihurtzea lanak bukatutakoan eta egungo sarrerak berrantolatzea, ikuspen hobeko tokietan kokatzeko. Bost metro eta erdi zabal izango da errepide berria, 2,75 metro zabal noranzko bakoitzean, eta 50 kilometro orduko izango da abiadura muga orokorra.

Arabako Batzar Nagusiek 2014ko uztailaren 16an agindutakoa betetzen du Bide Azpiegituren eta Mugikortasunaren Sailak proiektu honekin. Batzar Nagusiek, osoko bilkuran, talde politiko guztien oniritziarekin, mozio bat onartu zuten orduan, non foru aldundiari eskatzen zitzaion aipatutako errepide hori zabaltzeko eta hobetzeko lanak egin zitzan.

Proiektu honek jarraitasuna ematen die Errepideen Foru Sarea hobetzeko eta erabiltzaileen erosotasuna eta segurtasuna hobetzeko aurten egindako inbertsioei, eta bat dator inbertsio publikoa berreskuratzeko eta eraikuntzaren sektoreko jarduera eta enplegua sustatzeko borondatearekin.