Haur eta gazte literatur itzulpenik onenak sarituko ditu Udalak

Gasteizko Gobernu Batzarrak haur eta gazte literaturaren alorrean euskarara egindako itzulpenik hoberenak saritzeko 'Vitoria-Gasteiz' sarietarako deialdia onetsi du. "Haur zein gazte kategorietako irabazleek 9.000 euro jasoko dituzte", azaldu du Udalak.

Itzulpen gailenentzako sari horien hamabigarren edizioan, gainera, Gasteizko udalerrian erroldatuta ez dauden itzultzaileek ere hartu ahalko dute parte. "Izan ere, 2013. eta 2014. urteetako edizioetan bakarrik hirian erroldatutako profesionaletara mugatu zen lehiaketara aurkezteko aukera, baina aurten sariek 2002an sortu zirenetik aplikatutako irizpidea berreskuratu dute", gogoratu du Urtaran Gabineteak.