Wovenhand-ek Gasteizko Azkena Rock jaialdian joko du

Last Tour enpresa antolatzaileak jakinarazi duenez, David Eugene Edwards musikari eta abesti idazlea Wovenhand taldeko liderra da. 2001ean, 16th Horsepower taldea utzi eta Wovenhand martxan jarri zuen, aurreko taldearen ibilbidea jarraituz baina bere nortasuna ageriago utziz. Bi taldeetako lan ugariek musika alternatiboaren munduko artista belaunaldi oso batean eragina izan dute.

Wovenhand taldearen musika definitzea ez da erraza, neo folk, post rock, punk eta soinu alternatiboak nahasten baititu. "Izan ere, Edwardsen ahots kartsua eta bere espiritualtasun kristauaren etengabeko bilaketa taldearen bide dira", azaldu du.

"Refractory Obdurate" (2014) Wovenhand taldearen zazpigarren eta orain arte duen azken diskoa da. Bertan, Edwardsek aurreko diskoetako ildoa jarraitzen du, behin betiko soinuaren bila.